MASOMO YA MISA JUMANNE, SEPTEMBA 27, 2022 JUMA LA 26 LA MWAKA

Kumbukumbu ya Mt. Vinsent wa Paulo, Padre

SOMO 1

Ayu. 3:1 – 3, 11 – 17, 20 – 23

Ayubu alifunua kinywa chake, na kuilaani siku yake. Ayubu akajibu, na kusema; naipotee mbali ile siku niliyozaliwa mimi, na ule usiku uliosema, mtoto mume ametungishwa mimba. Mbona sikufa mimi tokea mimbani? Mbona nisitoe roho hapo nilipotoka tumboni? Mbona hayo magoti kunipokea, au hayo maziwa, hata nikanyonya, maana hapo ningelala na kutulia; ningelala usingizi; na kupata kupumzika; pamoja na wafalme na washauri wa dunia, hao waliojijengea maganjoni; au pamoja na wakuu wenye dhahabu, waliozijaza fedha nyumba zao; au, kama kuzikwa mimba iliyoharibika, nisingekuwako; kama wachanga wasiouona mwanga kabisa.

Huko waovu huacha kusumbua; huko nako hao waliochoka wakapumzika. Mbona yeye aliye mashakani kupewa mwanga, na hao wenye uchungu rohoni kupewa uhai; ambao wangojea mauti, lakini hawayapati; na kuyachimbulia zaidi ya kutafuta hazina iliyositirika; ambao wafurahi mno, na kushangilia watakapoliona kaburi? Kwa nini mtu aliyezibiwa njia kupewa mwanga, ambaye Mungu amemzingira kwa ukigo?

Neno la Bwana ..................Tumshukuru Mungu

WIMBO WA KATIKATI

Zab. 88:1 – 7 (K) 2

(K) Maombi yangu yafike mbele zako, Ee Bwana.

Bwana, Mungu wa wokovu wangu,

Mchana na usiku nimelia mbele zako.

Maombo yangu yafike mbele zako,

Uutegee ukulele wangu sikio lako. (K)

Maana nafsi yangu imeshiba taabu, 

Na uhai wangu umekaribia kuzimu.

Nimehesabiwa pamoja nao washukao shimoni,

Nimekuwa kama mtu asiye na msaada. (K)

Miongoni mwao waliokufa nimetupwa,

Kama waliouawa walalao makaburini.

Hao ambao Wewe huwakumbuki tena,

Wametengwa mbali na mkono wako. (K)

Mimi umenilaza katika shimo la chini,

Katika mahali penye giza vilindini.

Ghadhabu yako imenilemea

Umenitesa kwa mawimbi yako yote. (K)

SHANGILIO

Zab. 130:5

Aleluya, aleluya,

Roho yangu inamngoja Bwana, 

na neno lake nimelitumainia.

Aleluya.

INJILI

Lk. 9:51 – 56

Ilikuwa, siku za kupaa kwake zilipokuwa karibu kutimia, Yesu aliukaza uso wake kwenda Yerusalemu; akatuma wajumbe kutangulia mbele ya uso wake; wakaenda wakaingia katika kijiji cha Wasamaria, ili kumtengenezea mahali. Lakini wenyeji hawakumkaribisha kwa vile alivyouelekeza uso wake kwenda Yerusalemu. Wanafunzi wake Yakobo na Yohane walipoona hayo, walisema, Bwana, wataka tuagize moto ushuke kutoka mbinguni, uwaangamize? Akawageukia akawakanya, wakaondoka wakaenda mpaka kijiji kingine.

Neno la Bwana...Sifa kwako, ee Kristo